Logistiek 6 – Deel 2

SEKURITEIT

Huisvoorbereiding – Kluiskamer

In die gewelddadige kultuur waarin Suid Afrika verval met beide misdaad en gewelddadige protesaksies wat deesdae al meer na blanke woongebiede oorspoel, is een van die noodsaaklikste sekuriteitstoevoegings tot u huis, ‘n “saferoom.”

Meeste van u behoort die dramatiese tonele te onthou van Jodie Foster in die film ‘Panic Room.’ Kom ons doop dit in Afrikaans ‘n kluiskamer. ‘n Ironiese naam vir hierdie veilige plekkie, soos u later sal sien.

Die kluiskamer kan in beide grootskaalse anargie, asook met die daaglikse voorkoms van geweldsmisdaad en moord, ‘n groot lewensredder wees indien u om welke rede ookal nie betyds sou kon wegkom voor ‘n plunderende golf protesgangers nie, of sou geweldenaars toegang tot u huis wou kry is dit die een enkele manier om sonder konflik moontlik in die lewe gespaar te bly.

‘n Kluiskamer is ‘n plekkie wat u inrig om vir ‘n sekere tyd veilig te wees totdat die gevaar oorwaai, of hulp ontbied kan word. Daar is hoofsaaklik twee tipes kluiskamers. Die soort wat gebou word met die doel om ondeurdringbaar te wees vir die misdadiger, en tweedens die een wat fokus op onopsigtelikheid. Kluiskamers wat sterk gebou word, kan natuurlik ook onopsigtelik wees.

In hierdie skrywe gaan ons op kluiskamers en die installasie daarvan fokus, en spesiale aandag skenk aan die Suid Afrikaanse misdaadtendense met die behoeftes wat ons kluiskamer hiermee sal moet aanspreek. Ons gaan ook kyk na die koste van die oprigting van so ‘n kluiskamer, en natuurlik hoe om dit so koste-effektief as moontlik te doen.

Nie alle kluiskamers hoef soos die een in ‘Panic room’ te wees nie. As u oor daardie tipe finansies beskik, is dit uiteraard beter, aangesien dit:

  • Baie lank sou neem vir ‘n misdadiger om die kamer oop te breek.
  • Dit gebou kan word om bestand te wees, sou u huis afbrand.

Dit sou egter beteken dat die kluiskamer ‘n aparte toevoeging tot u bestaande baksteenhuis moet wees, met ‘n betondak, nie uit hout dakkappe nie.

Ventilasie sal ook met ‘n pyp ‘n hele entjie vanaf die huis ingevoer moet word om te voorkom dat rook en giftige gasse die kluiskamer binnedring, sou die res van die huis brand.

Die meer bekostigbare opsie, is ‘n kluiskamer wat goed weggesteek is en nie noodwendig ondeurdringbaar nie. In Suid Afrika sien ons gereeld hoedat massas protesgangers ‘n huis of winkel binnedring en dan in ‘n warboel gryp wat hulle kan en die plek leegdra.

Inbrake en aanvalle op die blanke gemeenskap het ook ‘n sekere tydsbeperking, veral as die aggressor die risiko loop om betrap te word. Hollywood het by ons al die konsep gevestig van ‘n inbreker wat fyn beplan, jou ure kan vaskeer, skynbaar sonder enige sin vir dringendheid om die toneel te verlaat. In werklikheid word hierdie misdade haastig gepleeg, tensy die aanvallers gerus voel dat niemand van hul dade bewus is nie. Ons sien dit by plaasmoorde en minder gereeld in dorpsgebiede.

Die kluiskamer is nie jou eerste lyn van verdediging nie, dis jou laaste. Dit beteken dat al die ander veiligheidsmaatreëls ook in plek moet wees. Dit hoef nie ‘n duur besigheid te raak nie.

Die eerste op die lys is om so vroeg as moontlik van ‘n moontlike aanval bewus te word. ‘n Hond wat blaf op die werf, of ‘n alarmpie wat afgaan, is van die goedkoop opsies. As u vroeg reeds van die beplande aanval bewus gemaak word, gee dit u tyd om veilig in u kluiskamer te kom. Baie spesialiste beveel aan dat u slaapkamer as so ‘n kluiskamer ingerig word. Dit gee u die voordeel dat u meeste van die nag reeds in die kluiskamer is, sou so ‘n aanval plaasvind.

‘n Paar spesiale aanpassingtjies kan hiervoor gemaak word. Die normale drieslaapkamerhuis se laaste slaapkamer in die gang, is gewoonlik die hoofslaapkamer. Deur ‘n vals deur te installeer, wat dit sal laat lyk asof die gang eindig na die eerste slaapkamers, is baie effektief. Dit kan ‘n boekrak wees met sy eie skarniere. Die boekrak kan gewoon soos ‘n deur oopswaai, maar met stewige slotte kan die hoofslaapkamer dan toegemaak word. In ‘n haastige aanval of plundersessie het min gewelddadigers die tyd of breinkrag om die huis oppervlakte deeglik te ondersoek.

Ons gaan u later verduidelik hoe om daardie haastige proses nog so bietjie aan te jaag.

Ander vroeë waarskuwingsbeginsels, is om buiteligte so te plaas dat skaduwees ‘n aankomende gevaar weggee. Grys klippies voor vensters en deur areas is ook raserig om oor te loop. Digte gordyne maak dit moeilik vir die aanvaller om te sien of daar beweging binne die huis is. Dit skep ook die onsekerheid van of u gewapen is, hoeveel mense daar is en of daar hoegenaamd enige mense is wat tot u voordeel sal tel, indien u in die kluiskamer sou verdwyn en die inbreker dink dat hy in ‘n leë huis ingebreek het.

U kluiskamer kan ook ‘n gedeelte in die huis wees waar ‘n gangetjie of eenkant van ‘n vertrek ‘n meter of twee van die muur af, met ‘n vals muur toegemaak word. Dit kan baie goedkoop deur droëmuur (drywall) gedoen word met die ingang, ‘n eenvoudige boekrakkie. Onthou dat die doel hier is om weg te raak, en dat die inbreker nie weet van die bestaan van daardie weggesteekte spasie nie.

As u so ‘n kluiskamer sou bou wat nie u slaapkamer is nie, poog om dit so na as moontlik op te rig aan die plek waar u die meeste tyd spandeer.

‘n Kluiskamer wat op hierdie manier gebou word, kan maklik beveilig word deur sandsakke aan die binnekant teen die muur te stapel. Selfs al sou u net ‘n gedeelte van die muur, ‘n meter of so hoog stapel, kan dit steeds goeie beskutting wees indien die aggressor ‘n paar skote daarheen sou skiet, sou hy dalk uitvind dat u daar binne skuil.

Die kluiskamer is dan ironies soos ons vroeër gesê het, die plek waar jy jou kluis in vasbout. Dit verbeter die kanse dat belangrike dokumente, waardevolle items, en natuurlik vuurwapens gesteel word, selfs met ‘n inbraak as u nie tuis is nie.

Die ander logiese rede is dat u toegang tot vuurwapens het, sou u vir veiligheidsredes die kluiskamerdeur agter u toemaak.

Die volgende belangrike items om in die kamer te hê, is kos en water. In uiterste gevalle kan mens vir ure of dae in so ‘n kamer wees. As u woonbuurt in anargie verval, sal u huis dalk in enkele minute geplunder word, maar om u huis mag dit moontlik vir dae of langer gevaarlik bly. Wees voorbereid om vir langer periodes in die kluiskamer te moet wees. Die entoesiastiese kyker, kan selfs aan sanitasiebehoeftes begin dink. Dink ook aan kroniese medikasie en ander items wat u mag benodig.

Die volgende is natuurlik die vermoë om hulp te kan ontbied. U kan vir skaars meer as ‘n R100 ‘n selfoon koop by Pepstores, wat permanent aan en gelaai binne die kluiskamer lê. Moenie die fout maak om die selfoon af te sit nie, hierdie foontjies speel almal ‘n harde deuntjie as dit aangesit word. Die selfoontjie se nommer sal natuurlik net vir noodgevalle wees. Laat bure, vriende en familie hierdie nommer stoor met ‘n naam wat aandag trek, soos ‘Noodgeval’ en u naam. Stoor die polisie, brandweer, en sekuriteitsmaatskappy se nommers op hierdie foon, en sorg dat u genoegsame lugtyd op hom het.

Aangesien u heel moontlik baie stil sal moet wees, reël met u geliefdes vooraf dat daar ‘n probleem is indien u hulle hoegenaamd sou bel, selfs al praat u nie aan die anderkant nie. Onthou ook om die foontjie op ‘stil‘ te sit, ‘n geliefde skakel dalk net terug met boewe wat ‘n foon agter die muur hoor lui.

Die volgende om te installeer, is ‘n alarm wat van binne die kluiskamer geaktiveer kan word. Die geweldenaars sal nie weet wat die alarm geaktiveer het nie, maar soos ons vroeër gesê het, sal dit hulle baie haastiger maak om met die wandaad klaar te kry.

Een van die meeste kritieke vrae of opmerkings, is gewoonlik die volgende: “Maar wat as hulle my huis afbrand?” In so ‘n geval is u in presies dieselfde posisie as wat u sou wees sonder ‘n kluiskamer, u sal gedwing wees om u huis te verlaat en die boewe te konfronteer. As u ‘n kluiskamer het, en u huis word aan die brand gesteek, het u nogsteeds dieselfde opsie.

Om ingelig te wees oor wat in u huis aangaan, verbeter u kanse op oorlewing net meer. Dit is goedkoop om ‘n klein kameratjie wat op ‘n goedkoop skerm binne die kluiskamer wys wat in die huis aangaan, te installeer. Vir bietjie meer kan daardie beeldmateriaal opgeneem word op ‘n hardeskyf wat baie voordelig is in hofsake wat volg. ‘n Goedkoper opsie is om sommer met u foon die skerm af te neem.

Indien u die kluiskamer so kan bou dat dit ‘n nooduitgang bied, kan dit gedoen word, maar hou spesifieke implikasies in gedagte. ‘n Ekstra uitgang bied gewoonlik nog ‘n plek vanwaar geweervuur kan kom, en die moontlikheid bestaan dat so ‘n deur van buite ontdek en oopgebreek kan word. Dit hou natuurlik voordele in indien u huis met ‘n petrolbom getref word.

By vêrre die belangrikste in die beplanning van u kluiskamer, is geheimhouding. As ek nie weet van iets nie, is my fokus op iets anders. Gee ook spesiale aandag daaraan dat u bediendes nie van die bestaan hiervan weet nie. In meeste gevalle werk hulle saam met die aanvallers. Ons gaan u nie voorskryf hoe om dit reg te kry nie, maar as hulle weet, is u moontlik net helfte so veilig in daardie plekkie.

Rig jou kluiskamer in, daar is deesdae baie situasies waar mens onveilig voel. As die krag afgaan, u is alleen by die huis, hoor iets buite, of selfs wanneer u uitvind van gewelddadige protes in u omgewing. Dit kan baie gerusstellend wees om gemaklik in u kluiskamer te sit en wag tot omstandighede weer beter lyk.

Indien u sou kies om u slaapkamer as ‘n kluiskamer in te rig, oorweeg die volgende:

  • Vervang die deur met ‘n soliede tipe deur en bring genoeg ekstra slotte aan.
  • Die venster moet versterk word met spesiale veiligheidsglas. Vir die wat bereid is om die ongerief aan te gaan, kan vensters selfs toegebou word.
  • As dit moontlik is om die kinders in dieselfde kamer te laat slaap, kry die hele familie ‘n rustige nagrus.

Daar is nog hope te sê oor hierdie onderwerp, maar gaan doen gerus self navorsing en pas dit aan om by u unieke behoeftes te pas.

Kampsekerheid

Gebruik oorleg wanneer u kies waar kamp gemaak gaan word. Sekerheid in die buitelewe neem drasties toe namate getalle van u eie mense toeneem. Probeer om nie in klein groepies te beweeg of kamp te maak nie.

Dit is hoekom ‘n gekoördineerde vlugsituasie so belangrik is. Let ook op die kampuitleg dat daar altyd natuurlike beskerming teen natuurrampe, rewolusionêres, gevaarlike diere, en selfs eie geledere is. Die ligging van berg of afgrond, rivier, ‘n dam, ens. kan soos by Bloedrivier natuurlike beskutting bied.

Kies u kampplek so dat gevare wat die omgewing vir byvoorbeeld kinders kan inhou, bestuur kan word. Baken gevaarlike plekke af met plastieklint, dit sluit in put-toilette, kragopwekkers, kookgeriewe, asgate, ens.

Implementeer streng reëls met betrekking tot wapenhantering en wapenveiligheid binne kampgebiede. Stel verantwoordelike persone aan vir polisiëring en implementeer stelsels waarby ondersoeke, aanklagte prosedures, en hofuitsprake gelewer kan word.  Dit sluit ook in die uitvoer van straf.

Doen voorbereiding vir veilige kook en vuurmaak fasiliteite. Skaf genoegsame beligting aan en toets hoe beligting aangewend kan word om beter sekuriteit in donker te bied.

Bespreek maatreëls wat ingestel kan word en voorbereiding wat gedoen kan word om logistieke middele veilig te kan toesluit vir veilige bewaring. Beplan so dat onvoorbereides nie kampgebiede deel met voorbereides nie om sodoende beter sekerheid vir voorbereides te bewerkstellig.

Werk ook saam om so vining as moontlik na ‘n vlugsituasie stapelvoedsel te bekom (soos graan by ‘n silo) vir onvoorbereides. Dit sal ‘n aansienlike sekerheidsrisiko verbeter.

Basiese selfverdedigingsitems soos messe, kapmesse, ens. behoort aangeskaf te word vir elke lid van die huisgesin, en ander wapens soos byle, grawe, vurke, ens. behoort weggebêre te word in ‘n kampterrein sodat vyandiggesindes nie maklik toegang tot sulke artikels bekom nie.

Elke lid van die familie behoort wettig gelisensieerde vuurwapens aan te skaf, asook die maksimum wettige hoeveelheid ammunisie. Lede kan aansoek doen vir sportskietstatus om sodoende meer wettige ammunisie te bekom. Baie lede het ook herlaai toerusting. Selfs indien lede nie self kan herlaai nie, kan hulle die wettige hoeveelheid slagdoppe, punte, en kryt aanskaf, aangesien dit nie deel uitmaak van die makismum hoeveelheid ammunisie wat ‘n lisensiehouer mag hê nie.

Kommunikasie, alhoewel dit elders behandel word, is ook ‘n belangrike sekerheidsitem in u voorbereiding.